بالرغم من انى هنا
ماليش شباك
ولا حتى باب ادارا بالاحلام وراه
بتخبط برضه ايديكى يوماتى
ع الفراغات الفاضيه فى عمرى
وعشان لسانى بجد بحبك
بأقوم افتحلك
يمكن صناديق الحزن بتتقل
وبأحاول ازيحها
يمكن كراكيب الغربه بتتعب عينى فى شيلها
يمكن يا حبيبتى كتير بتكعبل
وبأقوم مدغدغ
تلاتين سنه
وأنا لسه ما أتعلمتش المشى بسهوله فى الضلام
لكن بأقوم
وف كل مره بأسيب حاجات واقعه منى
يادوب اتلم على صورتى
انفضها
رجلين كتيره لطشت معظم ملامحى
هو انا
ما ترجعيش
ولا تخافيش
الدموع دى كلها
حبه كده وحتروح اوام
جوايا لسه بحر مالح م الدموع جى ف طريقه
بس يلقى جوه عينى لو لحظه له مكان
اخر الكلام
ما تودعيش
شنط الحزن كتيره ولازم اعيد ترتيبها
قبل مانقول ياسفر
محمد ابو عوض
